8 март – Халқаро хотин-қизлар куни байрами муносабати билан “Ўзбекистон темир йўллари” акциядорлик жамияти тасарруфидаги “Тошкент”, “Қўқон”, “Бухоро”, “Термиз”, “Қарши” ҳамда “Қўнғирот минтақавий темир йўл узели” унитар корхоналарида касаба уюшма ҳудудий қўмиталари томонидан тизимда фаолият кўрсатаётган хотин-қизлар ўртасида “Аёллар спартакиадаси” мусобақалари бўлиб ўтмоқда.   

Ана шундай тадбирлардан бири “Локомотив” марказий жисмоний спорт клубида ҳам ташкил этилди. Жамият тизимидаги ўндан ортиқ корхона, ташкилот ва муассасаларнинг 100 нафардан ортиқ хотин-қизлар иштирок этган мусобақада спортнинг 7 та тури бўйича баҳс олиб боришди. Ушбу мусобақа Ўзбекистон Рес­публикаси Президентининг 2020 йил 30 октябрдаги “Соғлом турмуш тар­зини кенг татбиқ этиш ва оммавий спортни янада ривожлантириш чо­ра-тадбирлар тўғрисида”ги фармони ҳамда Ўзбекистон касаба уюшмала­ри Федерациясининг 2020 йил 2 де­кабрдаги “Ходимлар ўртасида соғлом турмуш тарзини кенг татбиқ этиш ва оммавий спортни янада ривожлан­тиришга кўмаклашиш тўғрисида”ги қарорида берилган топшириқлар иж­росини таъминлаш мақсадида ўтка­зилди. Му­собақада “Ўзбекистон темир йўлла­ри” акциядорлик жамияти тасарру­фидаги завод ва корхоналар ҳамда “Тошкент минтақавий темир йўл узе­ли” унитар корхонасининг муассаса­ларидан иборат 20 га яқин ташкилот хотин-қизлари иштирок этди.

Таъкидлаш лозимки, спаркатиадада            1-босқич ғолиблари қатнашаётган бўлиб, улар дастлаб ўз корхоналарида ҳамда барча “Минтақавий темир йўл узели” Унитар корхоналари босқичларида 1-ўринни эгаллашган. Бу мусобақа эса 2-босқич бўлиб, иштирокчилар стол тенниси, волейбол, шашка, шахмат, стритбол, енгил атлетика ҳамда дартс турлари бўйича баҳслашишди.

Спартакиаданинг барча босқич­лари якунлари бўйича 1-, 2-, 3-ўрин ғолиблари аниқланди. Унга кўра 1-ўринни “Тошкент механика заво­ди” акциядорлик жамияти жамоаси, 2-ўринни Ҳарбийлаштирилган қўриқ­лаш бошқармаси жамоаси, 3-ўринни эса “Тошкент метрополитени” унитар корхонаси жамоаси қўлга киритди. Шунингдек, “Энг ёши улуғ иштирок­чи”, “Энг маҳоратли ҳаваскор спорт­чи”, “Ғалабага бўлган интилиши учун”, “Энг ёш иштирокчи” номина­цияларида ҳам ғолиблар аниқланди.

Тадбир якунида барча ғолиб­лар ва иштирокчилар Ўзбекистон темирйўлчилари ва транспорт қу­рувчилари касаба уюшмаси Рес­публика Кенгаши томонидан таъсис этилган қимматбаҳо совғалар ва дипломлар билан тақдирланишди.