![](/uz/faoliyat/soglomlashtirish-oromgokhlari/so-lomlashtirish-oromgo-lari/пккук.jpg)
Ўзбекистон Республикаси Президентининг 2022 йил 20 январдаги ПҚ-96-сонли “Заковат” интеллектуал ўйини аҳоли ўртасида оммавий маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида”ги қарори ижросини таъминлаш ҳамда 30 июнь – Ёшлар куни байрами муносабати билан “Темирйўлекспресс” АЖ ишчи-ходимлари ўртасида “Заковат” интеллектуал турнири бўлиб ўтди.
Корхона раҳбарияти ҳамда Касаба уюшмалари қўмитаси ташаббуси билан ташкил этилган мазкур турнирда корхона цех ва бўлимлари ходимларидан ташкил топган 5 та – “Тальго”, “Афросиёб”, “Ёш темирйўлчилар”, “Локомотив” ҳамда “Марказий бошқарма” жамоалари қатнашди.
Ўйин қоидаларига кўра, биринчи турда барча жамоалар иштирок этдилар. Жамоалар баллари тўғри берилган жавобларга кўра ҳисоблаб чиқилди. Турнирни очиқ ва шаффоф ўтказиш, жамоаларни кузатиб туриш мақсадида, бетараф назоратчилар танлаб олинди. Иштирокчиларга ҳар бир савол учун 60 сониядан вақт ажратиб берилди. 1-тур якунида баллар ҳисоблаб чиқилиб, тенг кучга эга бўлган жамоалар “Тальго”, “Афросиёб” ҳамда “Локомотив” жамоаси ўзаро беллашдилар.
![](/uz/faoliyat/soglomlashtirish-oromgokhlari/so-lomlashtirish-oromgo-lari/photo_2024-06-21_16-12-06.jpg)
Муросасиз, ҳаяжонли ва қизғин ўтган беллашувда, биринчи ўринни “Тальго” жамоаси, иккинчи ўринни “Афросиёб” жамоаси ва учинчи ўринни “Локомотив” жамоаси эгаллади. Турнир сўнггида корхона раҳбари Дилшод Ҳожиакбаров сўзга чиқиб, тадбир қатнашчиларини Ёшлар байрами билан табриклаб, қизиқарли ва кўтаринки кайфиятда ўтган турнир учун барчага миннатдорлик билдирди. – Мазкур интеллектуал ўйинларини ўтказишдан кўзланган асосий мақсад, корхонада фаолият юритаётган ишчи-ходимлар, айниқса, ёшларнинг интеллектуал ва профессионал билим даражаси, маънавий-ахлоқий савиясини мунтазам равишда ошириб боришдир. Шунингдек, бу борада билимли ва салоҳиятли ходимларга иқтидорини намоён этишлари учун етарлича шарт-шароитлар яратиш, уларни муносиб рағбатлантириш, ходимларда илмни қадрлашга, китоб мутолааси билан кўпроқ шуғулланишга ва билим олишга интилишлари каби тушунчаларни мустаҳкамлашдан иборатдир, – деди корхона касаба уюшмалари қўмитаси раиси Нодира Рамазанова. Турнир сўнггида ғолиб ва турнир иштирокчиларига корхона ва касаба уюшмалари қўмитаси раҳбариятининг “Фахрий ёрлиқ” ҳамда қимматбаҳо совғалари топширилди.